Posts tagged: historia

ERROMATARRENGANDIK GERATU ZAIGUNA

By , 2012(e)ko apirilak 4 15:23

Aurreko batean dokumental bat ikusi nuen Historia katean eta, bertan, erromatarrei buruz hitz egin zuten. Beno, erromatarrei buruz baino, beren arkitekturaz.

Erromatarrek eraikuntzarako zituzten ezagutzak eta sofistikazio-maila goraipatu zituzten erreportajeko adituek, eta zibilizazio haren handitasunaren erakusgarritzat hartu. Logika erraza da: erromatar zibilizazioa handia zen, milaka urte iraun dituzten eraikin erraldoiak egiteko gai zirelako. Horrek, berez, jendartea ezin hobeto bizi zela adieraziko balu bezala! Eztabaidagarria da oso kultura edota jendarte baten “handitasuna” neurtzeko modu hori, baina orain ez naiz horretan sartuko.

Kontua da, erreportajea ikusten ari nintzela, Erromako hiritar xumeak imajinatu nituela halakoak esanez: Ez al daude gauza beharrezkoagoak gure dirua horretan xahutzeko? Zergatik ez dute diru hori estoldak eta ubideak konpontzeko erabiltzen? Edo etxe guztietara ura irits dadin azpiegiturak eraikitzen?

Eta ondoren, etorkizuna imajinatu nuen: ikerlariak gure zibilizazioaren aztarnak aztertzen; gure eraikuntzarako gaitasuna eta, beraz, “handitasuna” goraipatzen. Ziur gutako asko ez litzatekeela irakurketa horrekin konforme egongo.

Bi mila urte igaro dira. Hainbeste aldatu al gara?

Badakit egungo krisiaren eta eraikuntzaren gehiegikerien lohietatik ari naizela historia interpretatzen. Baina akaso ez al da hori beti egiten dena? Historia garaian garaiko ikuspegitik irakurtzen eta berreraikitzen da.

Are gehiago, esango nuke askotan egungoa justifikatzeko erabiltzen direla pasatako garaiak; izan ere, gure zibilizazioa erromatarrenaren ondorengo zuzena eta isla den neurrian –alderatu, bestela, Estatu, Zuzenbide, Senatu eta abarren kontzepzioak, baita aurreko irudia ere-, horiek goraipatuz geurea goraipatzen dugu. Edo kasualitatea ote da eskoletako testu-liburuetan Grezia eta Erroma gailurrik gorenean jartzea eta Erdi Aroa putzurik ilunenean? Erdi Aroko nekazari eta artisauak erromatar -eta gure- kontratu-sistemako langileak baino “esklaboagoak” al ziren? Ez ote dago nolabaiteko doktrinamendurik horren atzean?

Ni behintzat, gauza batzuk zalantzan jartzera eta historia birpentsatzera eramaten nau honek guztiak.

Panorama Theme by Themocracy

Tresna-barrara saltatu